Thursday , 19 October 2017
Home / खेलकुद / विश्व क्रिकेट लिग:हङकङसँग नेपाल पराजित, विश्वकप छनोट खेल्ने सम्भावना लगभग समाप्त

विश्व क्रिकेट लिग:हङकङसँग नेपाल पराजित, विश्वकप छनोट खेल्ने सम्भावना लगभग समाप्त

 

असोज २७ / खगेन्द्र खरेल
विश्व क्रिकेट लिग च्याम्पियनसिपअन्तर्गत् हङकङविरुद्धको पहिलो खेलमा नेपाल पराजित भएको छ । पराजयसँगै नेपालको विश्वकप छनोट खेल्ने सपना लगभग समाप्त भएको छ ।

शुक्रबार हङकङस्थित मिसन रोडको मोङकङमा रहेको टिन क्वोङ रोड रिक्रिएसन मैदानमा भएको खेलमा हङकङले नेपाललाई ८३ रनले हराएको हो ।
टस जितेर पहिले फिल्डिङ रोजेको नेपालले अन्तिम बलमा हङकङलाई अलआउट गरेको थियो । हङकङले ५० ओभरमा सबै विकेट गुमाउँदै १९४ रन बनाएको थियो ।

हङकङको तर्फबाट जेमी एट्किन्सनले सर्वाधिक ७६ रन बनाए भने नेपालका सन्दीप लामिछानेले ३ विकेट लिए । त्यस्तै, बसन्त रेग्मी र करन केसीले २/२ विकेट लिए । १९५ रनको लक्ष्य पछ्याउँदै जवाफी ब्याटिङमा उत्रिएको नेपालले राम्रो प्रदर्शन गर्न सकेन । नेपालले ३४ दशमलव ५ ओभरमा सबै विकेट गुमाउँदै १११ रनमात्र बनाउन सक्यो ।

नेपालका तर्फबाट कप्तान पारस खड्काले सर्वाधिक २६ रन बनाए । सुरुआती ब्याट्सम्यान सस्तैमा आउट भएपछि नेपाली इनिङ्स धर्मराएको थियो ।
हङकङका लागि एहेसान खानले ५ विकेट लिए । नेपालले हङकङविरुद्ध दोस्रो खेल आइतबार खेल्नेछ ।

दुई वर्षदेखि जारी प्रतियोगतामा हङकङपछि नेपालले युएईसँग दुई खेल खेल्न बाँकी छ । तालिकाको शीर्ष चारमा रहेर एक दिवसीय विश्वकप छनोट खेल्ने सम्भावना जीवित राख्न नेपालले बाँकी रहेका सबै खेलमा सोचेअनुसारको परिणाम निकाल्नुपर्ने थियो ।

हङकङविरुद्धको हारले भने नेपाल डिभिजन ‘टु’मा झर्नेछ । यद्यपि, डिभिजन ‘टु’को प्रतियोगितामा शीर्ष दुईभित्र पर्नसके एक दिवसीय विश्वकप छनोट खेल्ने विकल्प बाँकी नै रहनेछ । विश्व क्रिकेट लिग च्याम्पियनसिपमा नेपाल हाल ८ अंक जोडेर छैटौं स्थानमा रहेको छ । १३ अंक जोडेको हङकङ चौथो स्थानमा रहेको छ ।

दुई खेल बढी खेलेको नेदरल्यान्ड्स १८ अंकसहित शीर्ष स्थानमा रहँदा १६ अंक जोडेको पपुवा न्यूगिनी दोस्रो स्थानमा छ । यसैगरी, तेस्रो स्थानको स्कटल्यान्डको १५ अंक छ भने १२ अंकसहित केन्या पाँचौं स्थानमा रहेको छ । छैटौं स्थानको नेपालभन्दा तल नामिबयिा र युएई रहेका छन् ।

Check Also

च्याम्पियन्स लिग फुटबल:रियल मड्रिड बराबरीमा रोकियो, म्यान्चेस्टर सिटी र लिभरपुल विजयी

  कात्तिक १ / खगेन्द्र खरेल युरोपको सर्बाधिक लोकप्रिय प्रतियोगिता च्याम्पियन्स लिग फुटबल अन्तर्गत गएराति ...

Leave a Reply

Your email address will not be published. Required fields are marked *